بكرمي الخاتوووووني الأسطوري ، سأسمح لكم بتصفح التي هي .. مدونتي
أرجو لكم وقتاً ممتعاً

الجمعة، 6 مارس 2009

مذكرة اعتقال بحق حسووون

آني حكتب هالبوست وادري ماحد حيعبرني، أدري الكل ملتهي بالأزمة العالمية مالته و التفنيش، الله يعيننا جميعاً يا رب..
بس ما ادري ليش عاجبني تقرون و لو حتى مجاملة، و يا رب أكدر و لو شوية أخليكم تبتسموون

ما ده أعرف هالشعبية هذي يوميا يطلع بيها مودة شكل..
هالأيام مثلاً، تقوم سودة الحسودة بحملة واسعة النطاق للدفاع عن البزازين ضد القهر و الدكتاتورية في هذه الشعبية و في كل الشعبيات الأخرى، و بدأت تفتر على البيوت و الدواوين تلقي المحاضرات في حقوق البزون و حريته في العيش و الخلفه و الأكل و النوم و التغوط.. كان ذلك عقب اهتمام مفاجيء و بلا مقدمات بقضية البزونة العرجة و ما سبب إنها عرجة، و هل انضربت بوري لو وكعت ببلوعة لو جتي لوري سايقها سكران سحك رجل المكرودة، لازم أكو سبب..

كان رد فعل نسوان الشعبية الغربية تفاعل واسع و نقاشات عديدة و اجتماعات لا تحصى، تمخضت عن تعليق لافتات من قبيل
(حرروا البزون)
(دعوا البزازين تعيش)
(من حق البزازين علينا أن تأكل الطعام)
(عش حياتك و لا تنسى البزون)
و غيرها..
أما رد فعل نسوان الشعبية الشرقية (اللي آني عايشة بيها) هو تفاعل أيضاً منقطم النظير، و صارت محاضرات البزون حديث كل دربونة و كل بيت و كل غرفة، أما آني كالعادة كاعدة مستمعة:
شفتي سودة الحسودة شلابسة بالمحاضرة؟ هدومها تجنن هيجي (دارك كولور) و (هاي ويست)
أي عفية، لو تسريحة شعرها، نص مشسور و نص محروك، من صدك حلو، حسويها بعرس بنت عمي"
يمعودين منيلها حلوة تلعب النفس، يعني شنو هدوم سودة عبالك رايحة تعدد
لا بالعكس هيجي شكلها مال سهرة تخبل، إنتي شفهمج بالمودة؟ إنتي أصلاً لما طلعت مودة الطاسة ما لبستيها
شنو عيوني؟؟ إسمعي عاد، آني بالمودة أفهم منج و من أمج افتهمتي لو لا؟؟
شنو شنو شنو؟ إنتي تفهميني؟
شنو شنو شنو (ده تعيب على هنيوة) أي يلا بالله ذبي لج فد جلمتين ثانية، مو إنتي ما ادري شمطول لسانج هاليومين، يراد له كص!!
هلو؟! د يلا عيوني كصي ده اشوف!

و لكم أن تتخيلوا منظر سوسو النازوكية و هي تفاكك بين سنيوة و هنيوة..

من صدك إحنا شعبية مخابيل، بالله نسوان الغربية لو يشوفونا هسة شحيكولون خخخخخخ


أما آني فكابلت البزونة العرجة أراقبها و هي تقلب الزبالة بحثاً عن بعض الطعام و حاطة إيدي على خدي، بالله كل هالبلاوي تسويها البزونة العرجة؟؟ الظاهر فعلاً جنا مباوعيلها بعين الصغيرة..
يعني هالبزونة هاي صار لها شكيد بالشعبية و طول النهار تفتر، بالحر و الرطوبة و المطر و البرد، لا احد جاب لها شوية أكل، وداها للبيطري، ما حد حتى يتعب نفسه يسألها شبيج
(حسومي سألها مرة شبيج، جان تكوله: ميوو!)
و ما لاحظت هالإهتمام من سودة الحسودة طول هذيج المدة، بالعكس..
يعني آني شخصياً مرة شفت سودة الحسودة لما داست على المرحومين أم و أبو البزونة، و يومها للأمانة حيل انقهرت (إهيء إهيء) ، و قدمت سودة الحسودة بعد مدة اعتذار مقتضب للعرجة مصرحةً بأنَّ السبب هو (شقة ثكيل) من قبل أم البزونة أيدها فيه أبو البزونة المذكورة تجاه أحد خنافس أبنها المدلل أبو الليل..

طبعاً حالياً أدخلت سودة الحسودة طرف جديد في القصة، هذا الطرف هو ... حسون
حيث أصدرت بالتعاون مع نسوان الغربية مذكرة اعتقال بحق حسون، متهمة إياه بالمشاركة بقتل أم البزونة العرجة و أبوها!!
آني للأمانة جنت شايفة حسون المكرود و هو يلعب بباب الحوش أثناء عملية قتل أم و أبو البزونة، بس شنو تهمته؟ و شلون شارك بقتلهم؟ الظاهر أكو فد فصل من القصة لازم آني مضيعته

خاتون، عوفيها عليَّ!
يمعودة حجية شحتسوين؟
لازم أكو سر، ليش البزونة العرجة؟؟ و ليش يعتقلون حسون؟ أكيد اكو فد شي.. فد شي إحنا ما شايفيه!
زين و شحتسويين؟
مو ده أكول عوفيها عليَّ؟ أبو المثل يكول: إنطي الخبز للخباز

صفنا آني و حسومي ع المثل مال الحجية، و جنا تقريباً فاكين حلوكنا.
كنت أحاول في ذهني إيجاد أي رابط بين البزونة العرجة و الخبز اللي حننطيه للخباز، أما حسومي فقد قاطع تساؤلاتي قائلاً:

خاتون؟
ها
هو الخباز مو نفسه اللي يسوي الخبز؟
أي
زين إذا هو يعرف يسوي خبز، إحنا زين ليش ننطيه الخبز؟
لا مو هاي لما يكون مخلص الخبز، ماكو؟ يعني لما يخبز للعالم و ما يظل عنده فإحنا لازم ننطيه
هاااااا فمن هييييجيي، لعد آني من أكبر يوميا أنطيه
أي عفية عليك حسومي..

المهم، و بعيداً عن أمثال الحجية اللي تبط الكلب و تتعب الأعصاب، أعدت الحجية عدتها، و استعدت للتجسس على مختبر سودة الحسودة، أخذت على عاتقها تحمل المشاق و المخاطر، و لكنها عادت بعد مدة و عبايتها مشككه، و فوطتها متخربطة، و نعالها الله أعلم وين (هي بالعادة تنساه بعد ممارسة مهامها)
و الصراحة، جان مما لا شك فيه إنه شكلها تعبان:
ها حجية، شصاير؟ شنو الأخبار؟
ها؟
أكول شنو الأخبار ما طلع وياج شي؟
باوعت بوجهي شوية و عوجت حلكها:
إمشي إمشي إمشي، يلا عاد!!
هاي شنو ليش هيجي تحاجيني؟
إمشي إمشي، يلا عوفوني بحالي ما يجي منكم غير القهر و البهذلة..
و مضت إلى غرفتها و هي تدردم بزعل

مو جني ترزلت؟؟ (إهيء إهيء)
بس للحق أقول يا جماعة، الحجية من صدك خطية، يوميا تمارس مهامها بدقة و احترافية عالية، و تحاول جهدها أن تقدم لنا الشائعات اللي توها طالعة من التنور، و لكن علاوةً على إنها لا تلقى أي شكر من الجوارين فهي تلقى أحياناً بعض المتاعب التي لا يستهان بها، الله يعينج حجية..
يعني هسة باختصار، راحت علينا..
لكن آني يا عيني الخاتووون ،لا أعرف اليأس، منو اليأس؟
قررت أتبع طرق حسومي في استنباط المعلومة، شلت الورقة و القلم و قررت إجراء تحقيق صحفي مع شخصية مهمة:
لماذا الإهتمام الكبير في هذه الأيام بقضية البزونة العرجة؟؟
...........
هممم، و لماذا تعتقل سودة الحسودة حسون تحديداً في هذه القضية؟؟
............ ميووو!!

هناك 7 تعليقات:

غير معرف يقول...

هههههههههههههه

حلوةةة تسلم ايدج

وينطبق عليها المثل اللي يقول ( very nice )

بانتظارج جديدج ،،،

زهرة الراوي يقول...

هممممممممممممم هناك نشاط في هذه المدونة، ونشاط عسكري تجسسي ، واعتقالات!
يمكن احنة العراقيين بعد منكدر نعيش إلا وية هيجي مصطلحات!

طبعاًَ خاتون إنتي مبدعة ، وآني كتلج من البداية ، فلذلك لازم - وبعد ماكو حجة - تشاركين بالمجلة العدد الجاي ، ولا نقبل بأقل من حجاية من سوالف الخاتون.

تدرين والله كومة ناس وأشياء خطية ، هسه اليوم من طلعت للداوم ، مو بس البزونة جانت ادور بالزبل ، بل واحد خطية هندي تعبان ، خطية والله الله يساعدهم ، واللي يقهر إنهم مسلمين والأجانب شغلهم ميعرفون يسووه وميركبون غير فورويل!

عموماً ، آني أود لو سودة الحسودة تصدر مذكرات اعتقال بحق مجرمي راس شارعنا لأن يحطون القطط بنص قفص ويدعبلوه ويضربون عليه ، ورغم إني تنزلت ورحت حجيت وياهم ، ورغم إنهم من يشوفوني براس الفرع رأساً يتفرقون ، إلا أنه قطط حارتنا لا يزالون يتعذبون ، ومن يمهم يطالبون بمن يطالب بحقوقهم ويصيحون ميوووووووووووووو

*الخاتــــIraqi Ladyـــووون* يقول...

عاااااااا خطية البزازين
آني بعد محاضرات سودة الحسودة أشو ما ادري ليش انقهرت عليهم
أكول تره الجهال مؤذيين، يعني خطية البزونة مو روح؟ ليش هيجي يسوون حرام عليهم، مرة الجاية كولي لهم سودة الحسودة تسلم عليكم و تكولكم: يكفي ظلماً، هالمرة سلام بس المرة الجاية اعتقالات ها..

رابعة العدوية، تسلمين عيوني ع التعليق..
و حلو هذا المثل، همممم، الظاهر أثرت بيج سوسوو..

Ali Yaseen يقول...

امممم خاتون اريدج تترجمين الكلمات الاتية:
هاي ويست
تعدد
شعبيات

بس مع عدم فهمي لهاي المصطلحات اللي شكلهة مفردات نسوية لكن من صدك ههههههههههههههههههههههههههههههه
لالا عودة لا يستهان بها خاتون
وهنيوة وسنيوة هههههههههههههههههه
الاسماء ما اعرف شلون تجيبيهة
بس اني خنكتني العبرة على المراحيم الاب والام اللي ماتوا موتة شنيعة
بانتظار الجديد بس يكون عن قريب خاتون يمعودة

*الخاتــــIraqi Ladyـــووون* يقول...

ها حجي؟ أخيراً، ها قد نورت مدونتي من جديد هوهوهو
شوف الترجمة
-هاي ويست: الخصر العالي (مودة)
-تعدد: من صدك ما تعرف شنو معناها؟ خخخخ حقك ما رايح لفواتح النسوان، تعدد يعني مثل الأفلام تكعد تكول( هاعمل إيه من بعدك يا حنفي، ما كانشي يووومك يا حنفي!)و عندك البقية!
- شعبية: معناها منطقة أو حي (بلهجة الناس اللي عايشة هنا)

ابو الحسن يقول...

شكرا على الترحيب الحلو

ههههههههههههههههه حلوة مال حنفي ذكرتيني بهذا المقطع
"الولية في الزمخشري يعني جمع ولية والولية هي الي تولول على جوزها لما يموت"
مدرسة المشاغبين

اما بالنسبة لكلمة شعبية فجانت مسببتلي ارق لانه اكو كارتون اسمة شعبية الكارتون وانتحرت وما افتهمت معناة الاسم

شوفي بالمدونة مال زهرة جنت اشرحلهة على انواع الجمة ههههههههههههههههههههه
والتسميات مالتنة من صدك رهيبة حسيت نفسي كاعد بالجزيرة

كبل جم يوم جابولي جمة من الامارات او من السعودية بس الصراحة طعمة مو طيب مثل مالتنة ما اعرف ليش عبالك شوية لين، مع انه استفسرت وكالولي انه لا مجمدي ولا خازنيه كبل من الكاع والى التنظيف ومن ثم الجدر

Leish يقول...

انا باحثة علمية
احاول فهم مجال المدونات الالكترونية
يا ريت تفسر لي هذه الظاهرة من وجهة نظرك

وتجيب لى الأسئلة التالية

كم عمرك؟
متى بدات التدوين؟
ما اسم المدونة الخاص بك؟

هل تدون وانت في العراق؟
لماذا تدون؟ يندر وجود ا الكهرباء ، والحياة صعبة... لماذا تدون؟
هل ما زلت تدون؟ لماذا؟
لماذا استخدام الاسماء المستعارة؟

يرجى ارسال اجوبتك


leishIraqia@gmail.com

شكرا مقدما و اخلص التحيات

باحثة عراقي